香港新浪網 MySinaBlog
« 上一篇 | 下一篇 »
基斯 Chris | 6th Mar 2008 | 又慳家 | (979 Reads)

昨日在「裕記」見D橙剛剛開箱,好鬼新鮮,又圓又發亮,只賣10蚊9個,於是用蝕少少5蚊4個買返去試!嘩!好好味呀!emotion

Picture

好甜,好有橙味,皮薄而且多汁!而且我仲「一橙兩味」,刮左D 橙皮出黎整鬆餅呢!我發覺由於呢隻「田夫甜橙」既皮比起「新奇士」既皮光滑得多,刮起zest上黎下下都刮到真正果皮香,而且感覺佢蠟質少D,唔使用百潔布涮咁耐!

大家發覺唔發覺,我地又不知不覺俾廣告洗左腦!奇實「新奇士」橙根本唔係佢講得咁好食,好多時淡味、乾水、蠟厚、皮仲厚、然後「囉柚」有個好大,唔食可惜,但又唔好味既「瘤」!然而咁麻麻地,賣11蚊3個都仲有大把市場!送禮、探病、拜神、招呼客人,買佢都好似大體D咁!

唔好幫襯咁多「新奇士」喇!何況佢咁遠從加州運過黎,食物里程好襟計,食個橙都食得好唔環保囉!


[1] surprised

唔怪得成日見好多人喺嗰度執嘢好似唔使$咁, 包括我亞媽(但係亞媽試過買過螺片煲湯, 佢話好似粉造, 唔知係咪流嘢).

唔係真係咁攪笑嗎, 用百潔布洗生果? 好似話洗蔬果時加幾滴白醋可以中和農藥, 再加少許鹽去可以擗菜蟲呢.我通常用亨氏or李x記的白醋.

廣告效應真係幾無敵, 最近學精了, 做個精明消費者, 有時平的也會筍過廣告品. 萬寧的yoghurt潤唇膏和自家盒裝紙巾又平又好用, 勝過好多大牌子.


[引用] | 作者 rose | 8th Mar 2008 | [舉報垃圾留言]

[2]

Hi Chris,
我舊年都有買過呢隻款的橙,覺得好好味,又甜、又冇渣。於是乎就搏命買,點知一次因為買得太多來唔切食而發現.....

你可以試試拎其中一隻橙唔食一直放響度,放好耐都得架,因為佢唔會發毛亦冇白點出現,外表仲係好結實呀,只係成日都變成黑色....有人話咁甜冇渣又好味係因為打過針同基因改造過....總之好恐佈..我以後都係買返3字頭的新奇士(4字頭的橙全部都基因改造,3字頭就safe),冇咁甜就冇咁甜喇 (TT)


[引用] | 作者 Mei | 5th Apr 2008 | [舉報垃圾留言]

[3]

不過我又唔覺得呢隻橙特別放得耐播!因為我都唔覺意有個擺到發左毛emotion!其實我諗D橙就係因為面頭噴左臘所以先放得咁耐,所以照計愈遠運過黎既,就愈噴得多臘,放得更耐!

基斯 Chris
[引用] | 作者 基斯 Chris | 8th Apr 2008 | [舉報垃圾留言]